لسعات ابو زنبور وين راحت 420 مليون دولار؟

بعد تعاون مميز من احد كتاب شبابيك استطاع الموقع من اقناع كاتب عراقي مميز اعتزل الكتابة عام 1979 ولزم الصمت لديه كثير من اسرار الماضي والحاضر اثر ان يطل بها من احد ابواب شبابيك ولينفرد موقع شبابيك بهذه الطلة الجميلة
موقع شبابيك يرحب بالمبدع ابو زنبور ويتمنى له التوفيق
ادارة شبابيك

ليش راح اسمي زاويتي لسعات ؟

ابو زنبور
لان لسعة النحل صحيح توجع لكنهه دوه لهواي امراض واهم مرض تداويه كرصات النحل ولسعات الزنابير هو الخمول والنسيان وهواي ينرادلهم لسعات حتى يورمون وتشوفهم الوادم على حقيقتهم وبلجن هل اللسعات تفيد واحنه نواعدكم راح نطير من بستان البستان ومن جهة الجهة ثانية بس مو النحجي على ربعه يظل يسبون ويشتمون بينه لان راح انجيبهم بالسره حتى ولا واحد يزعل
لسعة الافتتاح
كلي صاحبي جثير الصار زلمه كلش مهم بالمنطقة الخضراء ايكولون الله لو ينطي من الاول لو ينطي من تالي وجثير سالفته بعدين نسولف بيها لجن حتى تعرفون انه ماعندي لحية طويله ولحيه اكصيره حتى على جثير راح احجي ولو هو يدري انه كلش اعزه لجن جثير مثل اهواي من ربعه بالمنطقة الزرقاء عدهم خوش خلك يندارون بالعجل اولهه جان شوعي انوب صار قومجي ومن وكف شغل القوجيه واحترك عبد السلام عارف صار بعثي يساري ومن حبسه ناظم كزار صار بعثي صدامي وهسه هو اسلامي !!
بيه شي؟؟
افه بس لايزعل جثير واذا زعل يطبه رمي جا هو ما يعرف روحه ؟
يكول جثيرحكومة المالكي كطعت من حصة (اقليم كردستان) من الميزانية مبلغ 420 مليون دولاربعد ما حست الحكومة بالنفط المبيوك والي تساوي قيمته هاي الفلوس هسه الجماعة برزاني وطلباني وربعهم بالاحزاب سكتوا ولا واحد جاب اله طاري وقبلوا بالمقسوم لجن همه هم يكولون منو الحرامي الباك النفطات؟ والنفط مو من النفط الي اكتشفوه هسه وصدروه والشهرستاني ما موافق على بيعه يكول جثير هاي سالفه عتيجه
زين هسه الاكراد الكاتلهم الجوع والي بعدهم ليهسه مايدرون اشراح اتكلولهم ؟؟
خاف هم اتريدون اتذبوهه براس واحد براني بس ماطول ظليتوا ساكتين معناهه انتم تعرفون الواوي الباك الدجاجات بس خاف اتعلمون عليه وخاف يزعل السلطان لان محد ايريد ايجيب طاري واوي السلطان بالشر
يكول جثير الزين بحرامية الاكراد محد ينهزم ويطلع بره لانهم يكولون الله يحب الساترين واحنه انكول الله لايوفق كل حرامي وكل واحد يدري بالحرامية ويسكت عنهم وانه اكول والله العراق يشور